Цæцæны, Уæрæсейы адæмты иудзинады азы фæлгæты, рæгъмæ рахастой Ахмат-Хаджи Кадыровы чиныг "Адæммæ сидт" ирон æвзагыл. Тæлмац скодта, поэт, Уæрæсейы фысджыты цæдисы уæнг, Цæгат Ирыстоны культурæйы сгуыхт кусæг Баситы Зæлинæ республикæйы пысылмæтты дины управленийы сæрдар Гуæцæлты Хадзымураты æххуысæй. Ахмат-Хаджи Кадыровы поэзи фыццаг хатт сдзырдта æндæр æвзагыл - иронау. Фембæлды уазджытæ фехъуыстой æмдзæвгæйы скъуыддзæгтæ, уыдон уæлдай ирддæрæй æргом кæнынц адæмты иудзинад æмæ хæлардзинад. Нациты 'хсӕн ахастдзинӕдтӕ фидар кӕнынмӕ ӕвӕрӕн кӕй бахаста, уый тыххӕй Баситы Зæлинæйæн лæвæрд æрцыд Цæцæны сæргълæууæг Рамзан Кадыровы номæй бузныджы фыстæг æмæ Парламенты уæлдæр хæрзиуæг - парламентаризмы райрæзты тыххæй Орден. Делегацийы архайджыты Цæгат Ирыстоны национ политикæйы министрад æмæ Цæцæны фысджыты цæдисы номæй схорзæхджын кодтой Кады гæххæттытæй æмæ бузныджы фыстæджытæй. Мадзаларазджытæ фæнысан кодтой, ахæм проекттæ бындур æвæрынц культурон бастдзинадæн æмæ иумæйаг хæзнатæ фидар кæнынæн.